GEDAGTE VIR DIE DAG

DINSDAG 11 AUGUSTUS

Die vierde gebod sê dat ons die Sabbatdag heilig moet hou. Ons het ses dae om al die werk te doen wat ons moet en wil, maar op die sewende dag mag ons geen werk doen nie. Die motivering daarvoor is dat God in ses dae die hele wêreld geskep het en op die sewende dag gerus het. God het dus bedoel dat ons op Sondae moet rus.

Ek kan onthou dat ons as kinders op ‘n Sondag letterlik niks mag gedoen het nie: geen skoolwerk, geen speletjies, geen swem as ons op vakansie was nie, absoluut niks. Dit was hoe ons as gesin Sondae deurgebring het. Ons het kerk toe gegaan en dit was dit. Jy sou ook geen winkel oop kry op ‘n Sondag nie, wat nog te sê sportbyeenkomste.

Vandag lyk dit baie anders, ook in ons huis en gesin. Daardie absolute “verbod” word vandag baie selde so rigied toegepas. Ons sou ‘n lang debat daaroor kon voer. Mag ons sport beoefen, behoort die winkels oop te wees, ens, ens. Dit sou egter ‘n sinnelose tipe debat wees, want ons gaan nie almal met mekaar saamstem nie. Hoe gaan ons byvoorbeeld “rus” definieër?

Kom ons vra onsself eerder af wat die waarskynlike bedoeling met hierdie gebod was. Na my mening was die gedagte dat Sondag anders moet lyk as ander dae. Belangriker egter is die gedagte dat God op hierdie dag op ‘n spesiale wyse gedien en aanbid moet word. Deur die jare het Christene dus op hierdie dag eredienste gehou en ons doen dit nog steeds.

Eerder as om ‘n lys te maak van moets en moenies, is die kernvraag vir my: Het ek op hierdie Sondag iets spesiaals gedoen in terme van my verhouding met my God ? Het ek bietjie ekstra tyd gemaak om met Hom te praat en na Hom te luister ?

Ds Gerrie

Geestelike oefeninge: week 2

Welkom by nog `n week se geestelike oefening! Kyk na die onderstaande video-insetsel en dink daaroor na. Hier is `n paar wenke oor hoe jy kan nadink oor die gedeelte. Onthou hoe ons gesels het oor die feit dat elkeen van ons op `n ander manier by God "ingeplug" is?
Die wat God in die natuur ondervind: Kyk mooi hierdie week na die bome waarby jy verbystap. Hoe lyk die stam? Die lote? Dink aan jou verhouding met God. Voel jy gemaklik en tevrede oor die verhouding?
Die wat  God ondervind in doen:Dink na oor die video. Wat kan jy doen om `n verskil te maak in die mense rondom jou?
Die wat God in kreatiwiteit ondervind: teken `n prentjie van `n boom met `n stam en lote. Kyk hoe dik is die stam en die lote wat jy geteken het. Vertel dit iets van hoe sterk jy God se teenwoordigheid in jou lewe voel? teken nog n prentjie van hoe jou boom graag sou wou lyk. Sit die prentjies erens naby en kyk daarna as jy tot God bid elke dag.
As jy God in jou betrokkenheid met mense ondervind: dink oor jou vriende/vriendinne en bid elke dag dat hulle God se liefde en teenwoordigheid in hulle lewens sal ervaar.
As jy God spesiaal in  Bybelstudie ervaar, gaan lees  Joh 15  elke dag en oordink dit. 

-->

Filmresensie: Noah

Die verhaal van Noag bly ons betower. Dwarsdeur die wêreld vertel verskillende volke die verhaal van `n groot vloed, en hoe die wêreld oor begin het. Natuurlik is ons vertroud met die Bybelse verhaal van Noag(Gen 6-9), asook die babiloniese Gilgamesh-epos, wat baie ooreenkomste met die verhaal van Noag vertoon. Vroeër vanjaar was daar groot opwinding to nog `n babiloniese weergawe van die verhaal gepubliseer is. Die film Noah is deel van `n nuwe Hollywood-projek om Bybelse verhale te verfilm. Darren Aronofsky( wat self erken het dat hy nie gelowig is nie) was `n verrassende keuse as regisseur. Nog bekende sterre soos Russel Crowe(Gladiator, A Beautiful Mind) en Jennifer Connelly(A Beautiful Mind, Requiem for a Dream) is genader om hoofrolle in die film te vertolk. Die film was egter van die begin af kontroversieël, met Christene, Jode en Moslems wat die film verdoem het.

Die probleem met die film is dat Aronofsky sy verbeelding behoorlik gebruik om die verhaal te vertel. Die resultaat is dat ons met `n verhaal eindig wat eintlik min ooreenkomste met die Bybelse verhaal van Noag vertoon. Aronofsky het byvoorbeeld die verhaal van Noag gemeng met die buite-Bybelse boek van Henog,wat vertel van reuse wat die aarde bewoon het (miskien is Aronofsky te hard geoordeel-Genesis 6:1-4 vertel immers kortliks van hierdie reuse,en hy het hierdie gedagte net verder uitgebrei). Verder is daar duidelik agenda met die film: die gedagte van natuurbewaring en die oproep om die aarde te bewaar word later die hooftema van die film-anders as die genade-tema wat ons in die Bybel opmerk. Aronofsky se uitbeelding van God maak mens nogal ongemaklik. God is die starre,straffende God wat geen genade betoon nie, en volgens die film-weergawe is dit `n méns wat die keuse van genade maak, en nié God nie.

Natuurlik is dit maklik om fout te vind met enige film,veral een wat op die Bybel gebaseer is. Die waarde van Noag is dat dit ons aan die gesels kry oor die verhaal-en natuurlik dwing dit ons onwillekeurig terug na die Bybel om weer self weer die verhaal te gaan lees. Ouers kan dit as `n handige hulpmiddel gebruik om weer met hulle kinders oor hierdie treffende verhaal te gesels. Kom gesels gerus saam oor die film op Florandia se Facebook-bladsy.

 

Filmresensie: Philomena

`n Goeie film het `n paar bestanddele nodig: `n deurwinterde regisseur, gesoute akteurs en `n pakkende draaiboek. Die krities bekroonde britse film Philomena het al tekens van `n meesterstuk, maar daar is nog goeie redes om na hierdie meesleurende film te kyk. Ons is tans besig met `n tema Jesus:opbouer of afbreker? En hier fokus ons op Jesus se stryd met die Fariseërs,en veral hoe Hy hulle konsepte van God,geloof en gebed afgebreek het. Philomena sluit sterk by die tema aan. Die film is op `n ware verhaal gebaseer en vertel die verhaal van Philomena Lee(briljant gespeel deur Judi Dench) wat op haar oudag na haar verlore seun gaan soek. Philomena het as jong meisie swanger geraak en `n klooster het haar ingeneem. Dieselfde nonne wat haar moes beskerm,het die buite-egterlike kinders aan ryk Amerikaanse sakemanne verkoop. Philomena se paaie kruis met Martin Sixsmith(gespeel deur Steve Coogan) `n bitter joernalis wat onlangs sy werk as politikus verloor het as gevolg van `n politieke skandaal. Die gelowige Philomena en die bitter ateïs span saam om haar kind te gaan soek-die joernalis het natuurlik bymotiewe-hy wil munt slaan uit die sensasionele storie van Ierse kinders wat deur die kerk verkoop is.

Die verhaal is boeiend en meesleurend. Natuurlik is daar `n paar kinkels in die verhaal en die regissseur Stephen Frears(High Fidelity, The Queen) neem die kyker as`t ware op `n emosionele malemeule. Die interaksie tussen die naiëwe Philomena en die skeptiese Martin ,asook hulle diep gesprekke oor God, Godsdiens en geregtigheid is besonder treffend. Die ontknoping van die verhaal lei tot `n dieper definisie van christenwees wat lank by die kyker spook. Britse films is bekend vir die stadige ritme, diep intrige en skote humor,maar Philomena oortref enige verwagting( die film is vir vir 4 Oscars, 3 Golden Globes en 3 BAFTA-toekennings genomineer). Philomena is tans op DVD beskikbaar. Moet dit nie misloop nie!

Geestelike oefeninge: week 1

Ons het die afgelope tyd gesels oor Paulus se opdrag aan Timotheus om "Kaal te oefen" (1 Tim 4:7-oorspronklike Grieks). Dit beteken dat ons alles moet afgooi wat ons verhinder om nader aan die Here te kom. Ons begin ons oefenprogram op eenvoudige manier: kliek op die video en luister mooi na jullle eerste oefening. Die oefeninge sal later bietjie meer kompleks raak,maar kom ons begin met die regte gesindheid!

Hoe doen ons Bybelstudie?

Ons het die afgelope paar aanddienste gesels oor die tema"Hoe doen ek Bybelstudie?". Hier is `n paar hulpmiddels om te help met Bybelstudie.
Rick Warren se Bybelstudie metodes:
www.zondervan.com/media/samples/pdf/0310273005_samptxt.pdf
Ander metodes:
www.tenbasicsteps.org/english/bible/step5l7.htm
Sagteware:
www.bible-explorer.com
www.e-sword.net

Geniet julle Bybelstudie!

Belydeniskamp

Die belydenisklas van 2010 het in Aprilmaand die kamp bygewoon. Daar was egter enkeles wat dit nie kon bywoon nie. Die volgende kamp is vanaf 29 Sep-3 Okt 2010. Diegene wat nie in April kon saam kamp nie, moet die kerkkantoor so gou moontlik skakel.